戀愛綜藝《女神配對計劃2》剛過去星期日播出一集，五位女神正式同各位求愛勇者展開約會，當中部份遊戲真係睇到人面紅心跳。而節目播出前女神俞可程、陳若思、何沛珈、阮嘉敏、郭珮文就先出席宣傳活動，同求愛勇者一齊當住觀眾面前互動，更有MYNT魔音女團為大家獻唱節目主題曲。
女神同勇者們即席親密接觸，而其中Juliana唔止有舊愛ICE越洋再追，節目中仲有 李爾晨 加入競爭，呢日一個嬲字齊齊受訪，Juliana就直指氣氛尷尬，兩位男士更即場舌劍唇槍，火藥味唔細呀。
而同Mandy早已因拍劇認識嘅 吳旭東 由內地來港窮追，當場面貼面睇到都覺得面紅，佢仲非常自信咁話會用最大努力向Mandy付出，仲乜都話冇問題。
至於Oscar呢位冷氣師傅，唔止吸引到Kanis，連現場唔少觀眾都係為見佢而到場，佢仲指非常擔心自己遭淘汰。而Kanis就非常擔心Oscar揀其他女神，似乎已經曝露自己心意咁喎。
節目一播出有人氣亦同時有是非，好似Roxanne就於網上被指係雙面人，而Amber就被指拜金又收兵，兩人呢日亦直接回應澄清。
《女神配對計劃2》星期日晚 20:30 翡翠台