譚輝智 連續第三年舉辦生日會，一眾歌迷為佢慶祝生日，全場氣氛熱鬧到好似開演唱會咁，輝智收到歌迷滿滿嘅愛，當然有上台獻唱答謝歌迷支持。
呢晚輝智邀妹妹合唱，仲有搵TVB娛樂新聞台主播泉叔王鎮泉上台首度公開唱《愛如潮水》一展唱功。輝智太太一直支持老公追夢，今次生日會咁成功，呢位賢內助絕對係幕後功臣，輝智為太太送上驚喜，太太亦感動落淚。
輝智讚太太咁耐以嚟兼顧好多嘢，喺背後付出好多，輝智承諾用餘生報答太太，愛錫太太多啲，希望大家長命啲、朝夕相對時間多啲。
輝智出道3年幾，直認曾陷入迷茫階段，唔知自己唱到幾耐，仲有冇人會鍾意，輝智感激歌迷不離不棄，給予支持同信心，笑指向歌迷示咗好多愛，怕歌迷嫌肉麻添！
