王丹妮Louise 趁住中秋假期，去到多個地方宣傳10月1日半價睇戲活動，Louise向市民派爆谷，吸引唔少人同佢自拍。
呢日Louise以新髮型亮相，同大家習慣嘅短髮型像好唔同，所以有啲市民一時間都認唔出佢，甚至有人喺網上PO相問佢係邊個，不過Louise就展現出高EQ，唔單只唔介意，仲留言叫大家記得入戲院睇戲。
Louise就話平時謝票都係來去匆匆，而今次派爆谷就有多少少時間同大家傾吓偈、影到相，期間仲有唔少市民同佢講，平時正價都會買飛入場支持香港電影業。
由於老公 羅孝勇Sheldon 正於澳洲讀緊脊醫課程，近排仲開始忙實習，所以今個中秋Louise就同囡囡一齊過，雖然一家三口分隔兩地，但係都會盡量安排時間團聚，早前Sheldon先抽時間返香港出席囡囡嘅畢業禮，而Louise亦指平時如果有時間，都會飛到當地陪老公，佢仲話隔一段時間冇見，二人再見返感情都會濃郁啲，大家都會更精心設計行情、珍惜相處時間。
