Twins將於今12月假會展舉行Sidetrack演唱會，消息一出即全城瘋搶，一票難求，唔少fans撳唔到飛。主辦單位日前加開兩場，門票依然極速被售罄，主辦單位再宣佈終極加開一場，由十八號唱到二十三號，一連六場，跟大家預祝聖誕。
阿Sa直言對終極加場係開心又頭痕：「我自己都要上網撳飛呀，你哋真係唔好同我爭！我自己都係得十幾張，有冇搞錯呀！哈哈。冇咩事我都係部署吓點撳飛。」而阿嬌就話呢次Sidetrack演唱會對佢嚟講最大挑戰係，好似「全部都係新歌」咁，阿嬌笑言：「所有大家熟嘅歌，我哋都唔會唱。」阿Sa就話係唱得太多嗰啲唔唱。
一向好玩得嘅Twins，得知終極加場呢個喜訊，就玩一個「手機黑白配📱」小遊戲答謝歌迷支持，二人極近距離影對方，捕捉「死亡視角」，唔少歌迷讚二人就係死亡角度都靚到咁，仲話阿嬌靚樣真係360度都冇死角。
