徐紫茵、沈小婷、崔英俊、韓東、力丸、段藝璇、王怡人、男團Modyssey等多位內地、韓國、日本藝人現身香港，為一個潮流舞蹈大賽香港賽區比賽擔任評審同嘉賓。
幾位遠道而來嘅嘉賓都話，好開心可以嚟到香港出席活動。韓國女團Kep1er嘅中國籍成員沈小婷就話，好想食港式茶餐廳，可惜逗留時間太短，冇機會一飽口福。韓東就指之前有同團隊嚟香港開過演唱會，同香港粉絲留下美好回憶，最令佢掛住嘅就係香港嘅牛腩。
王怡人就表示，最想就係坐巴士一直行，再睇下沿途風景，因為自己由細到大都鍾意睇香港電影，想坐巴士見到熟悉嘅街道時可以落車行一行。
韓東目前以Solo歌手身份活動，由七個人變一個人都好需要時間適應，不過佢同Dreamcatcher嘅前隊友依然保持聯絡，仲會互相打氣！韓東仲話，其實大家對團體重組都抱以強烈嘅心，但目前都唔可以透露太多，請大家靜候佳音。
王怡人喺團體EVERGLOW解散之後同樣開始做個人發展，佢表示壓力大咗唔少，而且好多責任需要一個人承擔，亦都會懷念團體活動嘅時光。