中聲歌手 羅啟豪 顏志恒 劉威煌 同 梁浩賢 一齊為於漆黑中舉行嘅音樂會宣傳，四位唱將率先體驗全黑旅程嘅感覺，大家都有唔同嘅感受。Ramon指呢次同之前佢喺漆黑中做音樂會感覺差唔多，自己嘅音樂會係負責唱歌、講故事，但呢次係會更立體放大感官。
而Benson就話雖然呢次有朋友、導賞員陪伴體驗，但經歷短短15分鐘後，令佢覺得既驚亦敬佩視障人士，更呼籲大眾要共融，體驗過就會明白視障人士有好多好厲害嘅地方。
Ramon講起之前喺漆黑中演出嘅經驗，佢就話喺伸手不見五指嘅環境下演出可以更專注唱歌嘅地方感動大家。而Benson認為，即使係一般嘅演唱會，都會有拍掌歡呼聲，但呢次就會喺全黑寧靜之中進行，佢都要適應同調整心態。
至於歌單方面，浩賢就話唔好揀快歌，揀返感情濃烈嘅慢歌，因為見唔到歌迷反應，所以可以放膽去唱，威煌就話會好期待完騷後同歌迷交流，想知道大家嘅感受。
