呂良偉以及太太楊小娟、吳業坤、港姐袁絲珩、鄧匡閔、李澤欣、李澄晴、莊思敏、田啟文等藝人現身一個慶祝活動。
戀愛真人騷《女神配對計劃2》嘅女神阮嘉敏同求愛勇者吳旭東日前出席宣傳活動時，當眾磨鼻尖已經好有火花，旭東仲拍晒心口話會克服Long D阻隔，令Mandy得到最大安全感。
Mandy呢日就話，節目對自己嚟講除咗係工作，亦希望可以遇到一個可以將來可以一齊好好生活落去嘅對象，所以都會繼續觀察旭東。
同場嘅Jacquelin因為早前上載亡母嘅靈堂片段而惹嚟妹妹莊思華不滿，兩姊妹更因此隔空開火。Jacquelin出席活動時都有開腔回應事件，表示每個屋企之間都會有衝突同矛盾，只係呢件事公開咗，令人覺得好嚴重，但事件已經過去就算亦無謂追究責任同再討論，而家人之間亦一直有繼續溝通。
同樣要為是非傳聞解畫嘅仲有田啟文，早前田雞接受訪問時大爆李力持係雙面人，但其實佢就話係被標題黨作祟，更笑指李力持唔係雙面人，而係八面玲瓏、多才多藝。至於講到未來工作計劃，田雞就話好快會官宣一啲同周星馳嘅合作，會係同電影有關，都想幫助一啲過去合作嘅兄弟，佢都好感動星爺日理萬機仲記得以前嘅兄弟，呢份情好難能可貴。
幾位港姐呢日就神采飛揚出席活動，啱啱去完韓國旅行嘅李澄晴就開心表示自己日食夜食，亦買咗手信送俾大家。袁絲珩就話，佢好想大家去泰國，因為可以租一棟別墅同一班港姐姐妹一齊住。
