一代巨星「哥哥」張國榮月中70歲冥壽，香港有多個唔同類型紀念活動展開。其中由 王家衛執導 嘅經典作《阿飛正傳》亦特別推出4K數位修復版，再次於大銀幕重現「無腳雀仔」嘅經典傳奇。
而電影公司亦與本地品牌合作，於銅鑼灣重現戲中「旭仔」同「蘇麗珍」邂逅嘅「60年代南華會小食部」場景，吸引大批影迷打卡「尋找消失嘅一分鐘」。
除咗本地影迷之外，曾與哥哥喺1999年合作經典港產片《星月童話》嘅日劇女王 常盤貴子 ，原來亦曾低調拜訪，仲特意前往小食部場景展覽參觀，感受故友昔日嘅電影氣息。
常盤貴子多年來一直未有忘記呢位昔日好拍檔。哥哥冥壽期間，佢就收到由前攝影記者分享嘅珍貴舊照，事後仲於社交平台分享，將合照珍而重之擺放於家中，遙祝哥哥生日快樂之餘，仲以中文寫道：「大家都愛你」，文末一句「我想再次見到你」更表達佢對故友嘅思念不減。
當年常盤貴子隻身來港拍戲，張國榮作為前輩，於現場主動以日語同手勢溝通為佢減輕壓力，仲充當私人「美食導師遊，帶佢品嚐香港美食。常盤貴子曾回憶，拍攝期間曾因水土不服住院，哥哥當時曾親自煲湯帶到醫院探望，又請香港醫生協助治療，令佢於異鄉亦感受無微不至嘅關懷。
其後哥哥離世，常盤貴子幾乎每年哥哥忌辰同冥壽都以唔同形式悼念。更曾向外表示：「張國榮是我人生中最敬重、也永遠不會忘記的恩師與朋友。」
