劉芷玲 喺熱播劇《死有對証》飾演 韋家雄 同 王綺琴 嘅千金林雪蕾，星期二播出一集嘅劇情講述，雪蕾明知自己唔係讀書材料，於是向爸爸提議想去日本讀聲優課程。雪蕾心知資深法醫爸爸同重案組高級督察媽咪對自己有好大期望，希望自己學業有成，踏出社會做專業人士。
而現實生活中，芷玲同雪蕾一樣同樣有夢想，芷玲喺社交平台發長文分享自己故事，佢話喺幼稚園時就睇TVB，當時已經擁有一個想表演嘅夢想，成日幻想有一日可以喺電視上演出，不過喺中小學期間，佢嘅夢想被人喺班房度大聲嘲笑，冇人支持自己，不過芷玲將嘲笑化為動力，努力學唱歌、跳舞同演戲，爭取演出機會。
喺無數失敗路上，芷玲覺得嗰啲痛苦流淚經歷，成為佢做演員嘅強處，而劇集《死有對証》同《靈戲逼人》就係佢得到嘅回報。雖然離開TVB後作品先播抆，不過芷玲仍然感到好開心，佢話：「多謝遇到林雪蕾，雪蕾的經歷和我真的有點像。無論是父母離婚，還是會說日文，堅持自己的喜愛，還有學校同學的一些。但雪蕾是個非常樂觀、堅強、善良、活潑同勇敢的人。我很喜歡她，希望我演繹出來的她，也有令大家感到喜歡。」
芷玲最後感激監製 黃偉聲 揀選佢出演，又多謝家雄哥同綺琴姐嘅教導同照顧，仲有同劇嘅一眾演員。希望大家記住《死有對証》，記住林雪蕾，亦都記住劉芷玲。
《死有對証》星期一至五晚 20:30 翡翠台