張振朗 同 劉佩玥 日前飛往新加坡同馬來西亞，與兩地粉絲慶祝中秋節，喺馬來西亞舉行活動當日雖然遇上大雨，但無阻粉絲嘅熱情，更以尖叫聲歡迎Owen同阿Moon到場， 眼見大家冒雨支持，振朗同阿Moon都好感動，佢哋仲同大家玩應節嘅遊戲，現場氣氛都不知幾熱鬧。而來自馬來西亞嘅中聲唱將 蕭偉倫 亦現身舞台，以歌曲同大家歡度中秋佳節。
振朗同阿Moon隨後又同另外兩位中聲唱將 尤淑情 鄭仲豪 一齊出席音樂節，現場仲有煙花匯演，第一次喺當地慶祝中秋嘅振朗同阿Moon亦趁機打卡留念，阿Moon仲大展歌喉，深情獻唱。
而尤淑情同鄭仲豪就以實力炸爆舞台，鄭仲豪話以往都係同家人度中秋，今年有機會同咁多人一齊過，係好特別嘅體驗。尤淑情話終於圓夢喺街頭獻唱，仲要有咁多人捧場，心情好興奮。
