顏米羔 雖然平時忙住幕前歌唱事業，不過一直未忘老本行嘅攝影專業。最近佢就同朋友合資開設嘅寵物攝影影樓，獲一眾中聲老友到賀。講到影樓嘅擺設，米羔都花盡心思，務求寵物置身其中有舒服嘅感覺，佢話因為地方太大，寵物反而會驚，所以佈置似家居感覺，等寵物嚟到似喺屋企感覺。
飼養寵物嘅過程，主人同寵物往往會建立一份有如家人嘅感情，每當面對寵物離開嘅時候，嗰份傷痛真係難以形容。呢日現身嘅 陳旭培 就經歷過嘅傷心唔止一次喇，佢話試過一段時間，連續幾年每年身邊都有一隻唐狗離開，自始就無再養狗。而 許文軒 同樣經歷過兩隻愛貓喺眼前離世，之後再無勇氣去經歷寵物生命喺手中流逝嘅感覺。 劉曉昆 同樣試過家中嘅倉鼠離世，佢要花一段時間先接受到。
