由台灣資深主持人 胡瓜 發起嘅公益演唱會，最新一輪演出邀請到 巫啟賢 擔任嘉賓，雖然係慈善騷，但巫啟賢當成自己個唱咁落力，送上連串首本名曲。
巫啟賢創作過無數經典歌曲，當中有一首未必係最hit，但對佢嚟講一定係最有意義，佢喺演唱會上分享自己8歲時母親離世，相隔咁多年，自己對母親嘅記憶、樣貌已經慢慢模糊，但佢話自己最記得嘅，就係對方叫佢返屋企食飯嘅聲音：「因為小時候我住在鄉下，到了晚餐的時間，我媽都會在門口，對外面大聲的叫『啟賢！回家吃飯，你死去哪裡啦！』」巫啟賢感慨表示而家自己想聽媽媽鬧佢一句都已經無呢個機會，所以佢就寫咗一首歌嚟思念媽媽。
之後巫啟賢又以結他自彈自唱，演繹多首其他歌手嘅大熱歌曲，佢仲即慶模仿好朋友張宇嘅獨特唱腔。雖然出道超過40年，但巫啟賢就話自己學習校長 譚詠麟 永不言休會繼續唱落去。
