張與辰、劉洋、李金凱、陳旭培、蔡宓婕（Mimi）同許美琪等幾位TMG歌手，呢日到影樓拍攝宣傳相，三位中聲3師兄，比起中聲4嘅師弟妹經驗豐富，擺Pose都熟練好多，尤其與辰呢排清減咗唔少，見佢身穿Deep V輕鬆駕馭，與辰坦言近日上咗磅，由之前食肥咗32吋腰瘦到28吋腰，佢好滿意現時成果。
劉洋同金凱成日孖公仔接Job，嚟緊佢哋好快又有新搞作，將會合作推出跳舞嘅快歌，兩人努力排舞中，金凱笑言佢哋最大風格就係亂跳。
旭培呢日着住厚西裝，仲戴埋皮手套，雖然熱到成身濕晒，但佢好enjoy，因為覺得呢個形象好夠型，正合佢心意。
Mimi呢日轉咗個新髮型，擺脫齊陰後睇上去清爽唔少，不過佢自己就對呢個新look冇乜自信，雖然收到好多網民讚好，但佢總覺得自己塊面好似大咗，唔敢笑，驚一笑就好肥。
美琪呢日影宣傳相心情興奮，事關佢由七歲開始嘅夢想喺呢一刻終於成真，冇諗過自己真正可以加入TVB呢大家庭。
