《中年好聲音4》嘅6位動物歌手周志康、劉佩玥、羅天宇、莫家淦、姚兵同黃建東傾力籌備嘅演唱會圓滿落幕，當晚吸引譚俊彥夫婦、黃日華、顏米羔、關嘉敏、王菲同未婚夫張子丰、孔德賢等捧場。
6位動物歌手獻唱多首快、慢歌曲炒熱全場氣氛，羅天宇唱唱吓就發生咗段小插曲，喺台上突然流鼻血要煞停，幸好一班兄弟立刻頂上，加上有陳懿德呢位廿四孝女友在場悉心照顧天宇，令佢好快可以重踏舞台同谷婭溦演唱。呢晚劉威煌、吳業坤、胡鴻鈞、關楚耀同趙浚承分別同動物歌手合唱。
周志文同德德喺開騷期間推出一個特製動物蛋糕，全場一齊賀天宇同阿康生日，德德仲向天宇獻香吻高調放閃，二人表現恩愛，及後喺慶功宴上，德德再送上一個天宇專屬嘅生日蛋糕，令男友冧爆。
天宇受訪時好感激德德所做嘅一切，仲話自己日前病咗，多得女友鼓勵同貼心照顧，辛苦德德喺演唱會當日全日做阿四斟茶遞水，兩人表現sweet，個個叫天宇快啲求婚，應驗《玄戰》所推測嘅喜事，但天宇同德德話暫時未知，連在場好友都催促佢哋，仲自薦做婚禮嘉賓幫手。
重溫《中聲4》激烈比賽過程
另外阿康同Moon喺完騷後同樣表示好不捨，因為大家好難得有呢個演出機會，加上大家都好熟絡，知道走到呢一步嘅經歷，一切得來不易，令佢哋特別感動。
