F4成員周渝民（仔仔）、吳建豪（VanNess）、言承旭（Jerry）及五月天阿信組成F✦FOREVER，日前喺杭州舉行一連兩日演唱會。雖然兩場騷撞上天氣不佳兼落暴雨，不過風雨無阻粉絲嘅熱情，最終兩日順利開場。
四子喺杭州站特別精心為歌迷炮製驚喜，唔只有旋轉花車繞場同全場歌迷互動，作為演唱會製作人之一嘅阿信仲寫咗新歌《今夜我要帶你高飛遠走》喺演唱會首唱，冧爆歌迷！
仔仔、VanNess、Jerry當年憑偶像劇《流星花園》爆紅，呢陣「流星雨」風潮一捲就廿幾年，成為一代人嘅青春回憶。喺演唱會第一晚，四子邀請當年為劇集唱主題曲嘅哈林庾澄慶做驚喜嘉賓。
哈林一出場即同四子合唱《第一時間》，而且佢同阿信相當調皮，喺唱出劇集主題曲《情非得已》前一直大賣關子吊大家癮，哈林更即興唱咗幾句自己嘅金曲，令大家都好開心。
最後哈林同FF齊齊帶動全場合唱《情非得已》，呢一Part勾起好多為重回青春時代而去呢場演唱會嘅歌迷回憶，喺網上分享感受，覺得好似坐咗時光機重返二十歲一樣！
