有「金牌經理人」之稱嘅霍汶希（Mani）近日推出全新網上節目，首集與容祖兒（Joey）、關智斌（Kenny）、許靖韻（Angela）、曾比特（Mike）齊聚。Mani大爆謝霆鋒年輕反叛衝動嘅秘聞，試過一拳把保姆車打凹；Mani又暗指張致恒係「最麻煩」，搞到關智斌被迫扮「表哥」送張致恒返學 。
Mani坦言「大師兄」謝霆鋒年輕時相當麻煩，祖兒爆霆鋒當年有次與Mani意見不合，唔想做Mani讓佢做嘅事，霆鋒一拳把保姆車打凹，Mani苦笑稱霆鋒係「鐵拳浪子」，承認霆鋒後生時反叛且有主見，Mani解釋有時件事可能係需要咁做，但霆鋒唔願意做，就唔係堅持咁簡單，仲可能係叫佢去東邊，佢就肯定行去西邊。
祖兒問到Mani帶過最麻煩嘅人係邊個， 隨即望向身旁嘅Kenny，Mani並冇開名，暗示係Kenny以前嘅好朋友，眾人恍然大悟，估計係Boy'z另一成員張致恒（Steven）。Mani直言對方真係好麻煩、極難管教，要逼佢返學，仲要用公司資源、司機，然後Kenny仲要扮演其表哥帶返學，指對方極難管教，喺前門入學校，跟住就喺從後門跑走！
而呢位疑似Mani口中嘅「麻煩人」，近日與太太區燕雯（雯雯）受訪時，爆夫妻日常相處因金錢及小孩管教問題起爭執，雯雯透露二仔張天牧確診自閉症及過度活躍症，大仔張天寶亦有情緒問題，會出手打弟弟，幾個小朋友較為「特殊」，喺屋企時常打架，需要將佢哋分房隔離，雯雯指經濟拮据仍堅持生四個，佢自責天真，相信張致恒給予嘅假希望 。
張致恒日前受訪爆為養活一家六口背負逾百萬巨債，曾到旺角某間財務公司借錢時，慘遭職員奚落，逼佢即席獻唱〈死性不改〉先肯減免數千元利息，事後有聲稱係「債主」連環公開多張對話記錄，踢爆張致恒私底下依然「周街借錢唔還」，稱其借錢時語氣卑躬屈膝，苦苦哀求，當苦主於向佢追討欠款，張致恒態度轉變，理直氣壯話冇能力還。