「金牌媒人」林盛斌（Bob）主持嘅TVB戀愛真人騷《女神配對計劃2》，逢周日晚上8點半於翡翠台播映。 呢個星期日（4 日）播出第五集，五位女神何沛珈（Roxanne）、阮嘉敏（Mandy）、陳若思（Amber）、俞可程（Kanis）及郭珮文（Juliana）與 16 位求愛勇者，繼續進行五角枱淘汰環節！
今集除咗有郭珮文及俞可程嘅「主菜飯腳」通關考驗，仲有「甜品飯腳」爭奪戰。今季由三角枱升級五角枱，呢張五角枱更可一分為五，各自獨立成為一張三角枱，換言之成功爭取「甜品飯腳」嘅求愛勇者，將可以與心儀女神撐枱腳歎甜品，16位「求愛勇者」出盡九牛二虎之力爭崩頭。
今日製作組率先公布Mandy「甜品飯腳」爭奪現場。當Mandy嘅關鍵詞「暖」一出，與Mandy心意相通吳旭東（東東）及譚梓樂（Hepta）即一支箭標向前爭櫈坐，二人咁啱睇中同一張櫈兼飛撲喪爭，場面極度混亂。
東東索性成張櫈擸走兼直接放喺Mandy面前坐下，伸出拳頭示意Mandy來個「fist bump」，行徑極浪漫有型兼霸道，眼見東東「霸總式」示愛，令現場所有女神及花生團全線陷入瘋狂叫囂狀態。
Mandy全程笑到個嘴合唔埋，事後Mandy坦言覺得東東好Man，就連出名要求高嘅阿Bob，對東東表示欽佩，當宣布東東有資格成為Mandy「甜品飯腳」候選人之一，忍唔住讚東東有型，東東搞笑咁向全場鞠躬致謝。
雖然今季《女神》講明「心意相通」對象隨時洗牌，但東東明顯全心全意衝著Mandy而來，而且爭奪女神芳心絕不手軟，癡情程度令其成為花生團團寵。東東為咗與Mandy同枱，出盡全力衝鋒爭取Kanis「主菜飯腳」名額、更一度因用力過猛變滾地葫蘆兼電話都飛埋出嚟。
Mandy與東東一樣長情，喺玩遊戲期間，透露曾「鍾意咗一個人九年，但我哋冇一齊過」，引發全場震驚，花生團讚Mandy好專一，Mandy解釋因小學三年級開始喜歡佢，升中學時再跟他同一個學校，佢不停同好多女仔一齊，等極都係未到自己，就覺得失望夠啦，望住佢就有一種青春嘅感覺。Mandy大方得體、又如此長情，難怪有網民熱捧Mandy為「女神天花板」。
