啱啱過去嘅10月1號除咗係國慶日，亦係賈思樂72歲生日，最鍾意熱鬧嘅Louie當然有朋友幫佢慶祝啦！Louie喺IG上載咗條短片，雖然係自己一個對住鏡頭唱生日歌，但就聽到旁邊有好多朋友合唱嘅聲音。
生日蛋糕牌簡單寫住「Happy Birthday to Dearest Louie」，並插上數字72嘅蠟燭。Louie唱唱吓生日歌，仲將數字蠟燭對調由72變27，非常鬼馬。好多圈中朋友同後輩好似陳潔靈、陳煒、王馨平、胡曦文、朱晨麗、黃建東等有留言祝賀。
Louie雖然已經72歲，無論心態同外表都keep住好young，仲要繼續扮靚，片中見到Louie身後有一片眼鏡牆，擺滿各種唔同顏色花款嘅眼鏡，Louie話自己最鍾意就係收集眼鏡，而呢度只不過係冰山一角。
