黎姿生日撞正國慶，佢年年國慶日都會同屋企人一齊慶祝，今年都唔例外。今年迎來55歲嘅Gigi，例牌post咗同屋企人慶祝生日嘅靚相，見到Gigi同父母、細佬黎嬰嘅合照，一家四口笑容燦爛，不過就唔見老公馬廷強同三個女入鏡。
除咗有屋企人陪伴，Gigi呢個生日仲收到幾個蛋糕同好多好靚嘅花束，足見佢嘅好人緣。Gigi喺呢個重要日子，當然要悉心打扮，著上大紅色長裙，同早前一身黑西裝，戴眼鏡出席公司股東大會嘅女強人look大相逕庭。
壽星女Gigi喺社交平台寫到：「收到許許多多真摯的生日祝福，心裡滿是感動與溫熱。生日對我而言，不只是屬於自己的日子，其實也是感恩的一天。感恩有我的家人，我父母在這一天誕生了我。感恩我有一班很好的朋友，支持我的同事。很多人問我生日要什麼禮物，我覺得最重要就是在我身邊疼我、愛我的人，他們每一個都健康、平安、開心，這就是我最好的禮物。好開心每年生日都有你們陪我度過這個特別的日子，願愛一直環繞著我們，日子溫馨順遂。」最後黎姿仲不忘祝大家國慶節快樂，祝祖國繁榮興旺！
