TVB台慶劇《璀璨之城》10月12號將會喺翡翠台首播，呢日一班演員們 張智霖、吳卓羲、姜大衞、江美儀、張曦雯、高海寧 同 陳煒 以劇中型格造型上陣拍攝宣傳海報，Kelly嘅大露背造型同高Ling一身裝扮，散發出濃厚嘅女人味。故事圍繞家族酒店集團嘅兩兄弟Chilam同阿Ron展開連場豪門明爭暗鬥，Chilam率先劇透時，就以「峰迴路轉」同「離譜」來形容劇情，仲以「邪惡」嚟形容自己嘅角色。
阿Ron喺劇中一直係哥哥嘅眼中釘，面對仇恨佢形容自己陰險得嚟又唔會太出面，佢話拍攝呢套劇最開心就係可以同Chilam鬥演技。
早前有傳阿Ron同Kelly因為拍呢套劇戲假情真，喺角色上Kelly會瞓身幫老公阿Ron爭取一切，飾演一個戀愛腦嘅老婆，Kelly話最初好難拿捏，因為好難想像愛一個人可以愛到連命都唔要，要用唔少時間先可以投入角色。
John哥同江美儀飾演一對，佢係一位嚴父同家族掌陀人，無論管教Chilam同阿Ron兩兄弟，或者喺生意上都好鋒利，就連John咁好戲都話演繹呢個角色好吃力，因為角色同佢真人相差太大，事關佢本人係一個慈父。至於美儀姐就搞笑話自己嘅角色有精神病，所以係本色演出，佢仲劇透自己喺劇中成日都要打人，所以好考體力。
飾演檢控官嘅高Ling以多套優雅服飾上陣拍攝，面對周遭嘅激烈鬥爭，高Ling自認係比較有良知嘅一位，事關自己喺劇中有一個非常善良嘅媽媽，面對險惡嘅環境，始終相信人性本善。
煒哥一身霸氣女強人look現身，佢係 John哥集團旗下嘅得力要員之一，見到 Chilam同阿Ron勢成水火，佢自己嘅角色就以利益為出發點，難免會偏幫，至於佢偏幫邊個，大家就要睇劇先知啦！
