林志玲呼籲媽媽們要學識愛自己 教識兒子踩單車心情矛盾

林志玲日前現身台北出席一個品牌活動，志玲姐姐雖然已經做咗媽咪，仍然好注重保養，佢話就算身份改變都唔可以忘記自己，更呼籲各位媽媽唔好放棄自己。

志玲姐姐話有開心嘅媽咪先會有開心嘅小朋友，要照顧好自己先可以照顧其他人，所以各位媽咪一定要學識愛自己。

志玲姐姐話自己不時會享受Me time，從中可以得到一啲小確幸，而最近令佢感到開心嘅仲有另一件事，就係仔仔學識踩單車。志玲姐姐話教阿仔踩單車嘅過程好有成功感，當自己真係放手，見到阿仔越踩越遠，又有一種阿仔離自己遠去嘅感覺，果然做媽咪嘅心情好矛盾。