參與《中年好聲音》首季再出發而奪冠嘅 周吉佩 10月8號就邁入40歲，雖然仲有幾日先生日，不過一眾好友就提早為佢慶祝，仲特登靜靜雞為佢安排一個突擊驚喜，令到佢O晒嘴呆若木「吉」非常感動。
吉吉指日前獲好友相約食私房菜，自己即時應承，點知去到餐廳一開門，就發現整個中聲家族不論係主持 車婉婉 評審 肥媽 張佳添 周國豐 導師韋綺姍，仲有各屆嘅參加者原來都一早已埋伏現場，齊齊開紙炮大叫生日快樂，令壽星本人呆立當場唔識反應。
呢日大家仲似乎一早有晒準備，齊齊戴上太陽眼鏡為吉吉送祝福，現場更有一張巨型海報預祝佢「唱出宇宙賺大錢」，認真有心。而吉吉亦留言寫道：今年40歲生日，本來只係打算低調慶祝，無諗過收到咁大驚喜，好多謝一班中年家族好友嘅心意，我衷心祝福大家身體健康、大紅大紫！！」
之後又貼出多張合照，再寫道話：「估唔到當年呃住老婆參加比賽，今天會得到咁多嘢，除咗改變咗我嘅生活外，仲得到咁多愛。🫶 感恩 🥹今次特別多謝周太嘅心思，到你呃返我兩個月。」
「男人40，好感觸！多謝上天給予我精彩嘅上半場，遇到美好嘅每一位好友。美酒佳餚、良辰美景，挚友知己。多謝這次驚喜派對🎉🍾🫶」
