向來熱愛古董車嘅 林德信，平時多以經典名車代步，不過呢日佢竟然心甘情願坐上乘客位，由愛妻 Candace 任柴可夫接送。原本以為係一場浪漫嘅夫妻互動日常，點知Alex就全程提心吊膽，甚至拍片紀錄老婆嘅「驚險」駕駛過程，夫妻互動爆笑又溫馨。
影片一開始就見Candace於司機位向鏡頭甜笑打招呼，Alex興奮表示有「靚女」親自揸車接自己，Candace亦甜笑回應係送老公買燒味。不過當準備開車時，Alex就發揮唔少男士嘅「副駕監工」本色，提醒老婆：「You have to back up first（你要先褪車）。」
估唔到Candace一臉疑惑反問：「What mode are we on right now?（而係係咩模式？）」瞬間令Alex頭上冒出三條線，直呼「Oh my god」，甚至幽默插入一段大媽騎電動車失控幾乎撞車賠錢，朋友飛腳踢倒嘅搞笑網路影片，表達心中嘅無奈與恐懼。
當Candace再次確認「Is it on reverse right now? I just want to be sure.（而家係R波？我想確認一下）」時，Alex更係崩潰掩面笑稱「我好驚」。最後Candace成功開車，仲笑住撒嬌，片尾佢仲甜蜜寫低「自己老婆都要錫住」，笑老婆之餘好在都仲有少少求生慾。
林德信同圈外女友Candace於2023年11月低調成婚，當時僅邀請親友到場，父親林子祥更於婚宴上高歌祝賀。婚後兩人感情極佳，並迅速升格為人父母，大女「林明」出生時更由爺爺林子祥親自命名。到今年8月，Candace再次順產誕下二胎小女兒，正式組成幸福的四口之家。
Candace外型甜美、性格率真，據指係專業清酒侍酒師，更曾獲選2020年「清酒小姐」。兩人經共同朋友介紹認識，因同樣熱愛戶外運動、瑜伽，加上生活志趣相投，相戀多年後修成正果。