38歲前TVB性感女星白雲（Snowy），自2021年與富二代建築師江俊霖（Kelvin）離婚，單身5年後再次墮入愛河，白雲於10月2號喺社交平台高調放閃宣布新戀情，新歡就係22歲德國機師「小鮮肉」，二人年齡相差16年，拍拖以嚟足跡遍佈歐洲多個浪漫景點，白雲更毫不吝嗇於社交平台展現其驕人身材。
白雲開心分享多張歐洲遊嘅甜蜜照，見佢同男友喺威尼斯貢多拉上深情擁吻、乘坐馬車喺街頭接吻，沉醉喺熱戀當中。白雲喺社交平台稱男友出生於2004年、自己出生於1988年，白雲與男友相差16歲，形容男友雖然年輕，卻比自己成熟。
白雲與男友目前努力經營呢段異地情緣，指二人相遇十分浪漫，呢段異國戀情並不容易，曾分開好長一段時間，兩人一個喺歐洲、一個喺亞洲，對方喜歡駕駛飛機，佢喜歡乘坐飛機，似乎未被分居異地影響感情。
白雲分享呢段衝破年齡與地域界限嘅姊弟戀最大挑戰就係語言問題考驗，男友講德文、佢講中文，平日主要靠英文溝通，並未阻礙戀情發展，白雲話自己英文水平有所進步，現時感情穩定。
白雲曾與建築師前夫江俊霖有過一段5年婚姻，有指當年因男方家人不滿佢經常喺網上曬性感照，性格又我行我素，最終成為離婚導火線。白雲離婚後堅持「性感是我的最愛」，如今佢覓得新歡，經常喺社交平台以「放題式」上載性感相，近日宣佈新戀情，白雲亦不忘曬與男友喺泳池邊嬉水嘅合照，見白雲身穿紫色低胸泳裝，展露35E澎湃身材。
