前「御用鬼佬」 布偉傑（Brian Burrell），當年於處境劇《同事三分親》中飾演「韋一」深入民心，「阿一」其後成為佢嘅代名詞。近日佢宣佈月中將舉辦兩場個人音樂劇《阿一．點止鬼佬咁簡單2 — 植根》，更透露極可能係佢「告別之作」，騷後將移居日本福岡展開全新生活。
去年曾參加《中年好聲音4》海選嘅 布偉傑 ，社交平台發布影片，親自解答唔少觀眾疑問。透露曾有人擅自修佢嘅維基百科資料，指稱佢重返老本行行做IT，亦有人以為佢已轉往內地發展。阿一否認其事，更指近10年經歷了不足為外人道嘅心酸，生意倒閉又一度陷入經濟困難，如今選擇站上舞台，透過18首歌同大家分享真實人生。
現年53歲嘅布偉傑，精通廣東話、普通話、英語等語言。加入TVB後，參演過多部劇集，包括代表作《同事三分親》、《珠光寶氣》、《福爾摩師奶》、《黃金有罪》 等，經常飾演高級警司或外籍高層。
2018年離巢後，佢積極嘗試多元化發展，近年轉型從事戲劇教育外，對音樂依然充滿熱誠，曾組樂隊「港三港四」演出，亦曾參加《中年好聲音4》海選，即將告別香港前往福岡展開新生活嘅佢，獲唔少網民留言祝福，期待佢於音樂劇順利演出，順利展開日本新生活。
