型男黃宗澤（Bosco）係忠實賽車迷，近日前往馬來西亞朝聖，獻出人生第一次現場睇F1國際賽事嘅體驗，見佢直接闖進Pit Lane，近距離圍觀車隊車庫，又曬出與偶像Fernando Alonso（費蘭度·阿朗素）嘅自拍，秒變開心小粉絲。
Bosco喺社交平台分享現場打卡照，Bosco與偶像Fernando Alonso合照並留言：「終於見到你啦⋯⋯！ Finally meet you! Yeah……✌🏼✌🏼✌🏼🏎️🏎️🏎️」隔住mon都感受到佢追星嘅興奮心情。西班牙賽車手Fernando Alonso係F1歷史上最資深、最具天賦嘅傳奇賽車手之一，兩屆一級方程式賽車世界冠軍，累積超過400場F1出賽紀錄、32場分站冠軍、106次登上頒獎台。
Bosco早前透露一得知F1重返雪邦國際賽道，就馬上托朋友買飛，仲曬出4組Paddock Club貴賓頂級門票，相中見Bosco身穿Aston Martin車隊嘅「綠色戰衣」，進入車隊車庫參觀，而貴賓區設於維修區及主直道上方，可以近距離感受賽車進站與沖線嘅震撼，Bosco亦旋即成為貴賓區焦點，唔少觀眾想同Bosco影合照，Bosco非常親民來者不拒，為觀眾帶嚟雙倍嘅快樂。
