陳曉華 姚子羚 鍾柔美 關嘉敏 仲有久未於香港現身嘅 李雨陽 等，呢日一齊參與一個國慶活動，而 林夏薇 參與嘅重頭劇《玫瑰戰爭》，呢日佢就指非常喜歡自己演出嘅角色，加上又係再一次同 楊茜堯 合作火花四濺咁話。
薇薇又提到今次同 陳豪 茜堯以及子羚最多對手戲，更指估唔到阿Mo嘅幽默感非常強，仲學到唔少嘢咁話。
至於上一季曾與自己配對嘅Matthew，竟然於新一輯再參與求愛勇者行列，Carman指自己當時見到對方即時呆立當場，亦未特別了解對方參與嘅原因，仲幫對方講說話指可能自己未符合擇偶標準呀。
Yumi早前參與義工為基層清理家居，亦專注健身操練，但係就因為要節食而有少少唔開心，正努力調節當中喇。
已好一段時間未有於香港現身嘅 李雨陽 呢日一頭銀髮現身，仲話有興趣再戰幕前，仲於網上平台以AI製作短片，希望勾起觀眾對佢當年參演《四葉草》嘅回憶咁話。
