戀愛真人騷《女神配對計劃2》當中嘅 阮嘉敏 同內地型男演員 吳旭東，將「霸道總裁劇本」搬到現實！兩人因合作拍網絡短劇而結緣，而吳旭東竟不遠千里飛到香港參加節目，更指名要追求曾合作演出短劇《瘦一斤，賺一斤，虐哭前任不過癮》嘅阮嘉敏，呢份誠意已令唔少觀眾高叫甜到入心喇。
阮嘉敏 同 吳旭東早前於短劇中飾演情侶，吳旭東今次更由短劇男主角秒變「真人騷情聖」，追嚟香港為奪女神芳心。雖然部份觀眾質疑「到底係節目效果定係真愛火燃燒」，但兩人戲裡戲外嘅默契同眼神交流，就已令節目觀眾非常投入喇。
而同為「女神」嘅 何沛珈 於新一集節目播出前，於社交平台貼出一段助攻短片，標題以「Helping my friend to meet her crush（幫朋友見心上人）」為主題。
片段中，Roxanne陪Mandy散步，而吳旭東正喺旁邊低頭睇手機。阮嘉敏當時一臉害羞，點知Roxanne竟然使出一招「友情神助攻」，直接將Mandy推到吳旭東身邊，然後即興奮跑開。而被「突襲」嘅吳旭東瞬間扶實伊人，兩人相視甜笑，真係冧到毛管棟呀！
雖然只係為節目宣傳嘅影片，不過爆笑又充滿愛意嘅「助攻現場」片段曝光後，網民就紛紛留言大讚，好似話Roxanne呢個朋友識得過，仲有人認為Mandy同阿東眼神已出賣心中情喇。
35歲嘅阮嘉敏自參選港姐入行後，曾擔任《東張西望》主持同參演多部劇集，Mandy外型甜美加上親和力十足，早已係唔少男士心中女神。而吳旭東就憑帥氣外表同挺拔身材，於短劇界累積唔少人氣。今次兩人由「短劇拍檔」火花延伸到真人騷節目，究竟最後係咪可以修成正果呢？
《女神配對計劃2》今晚 20:30 翡翠台