梁詠琪 當年同西班牙籍老公 Sergio ，於西班牙結完婚返港時，喺機場引嚟無數媒體追訪，呢次Gigi接受《一周星星》訪問時，都有重提呢段往事，Gigi話當時見到咁多人影，自己其實好驚，同時亦令佢諗返啲唔好嘅回憶。
myTV SUPER重溫《一周星星》精彩內容
Gigi仲話當時步出機場前，除咗要做好心理建設外，亦同Sergio講叫對方唔好拖住自己，亦唔可以有太親密嘅舉動，因為擔心會被媒體亂寫。Gigi話而家睇返轉頭，自己唔會再驚，因為明白到呢啲都係傳媒嘅工作，大家都係對事而唔係對人，只要大大方方，大家得到要交差嘅功課就OK。
婚後Sergio選擇喺香港生活，Gigi指有段時間二人都會被狗仔隊追訪，佢坦言當時自己相當不安，因為擔心會被亂寫，所以每次見到狗仔隊影相，即使喺餐廳食緊飯都好，佢都會想拉住Sergio即刻返屋企，呢個時候Sergio就會安撫佢嘅情緒，漸漸Gigi見到關於佢哋嘅報道都相當正面，先令佢唔再驚被傳媒追訪。