由泰國通 胡慧冲 主持嘅節目《冲遊泰國12》已經開始播出，今輯Roger邀請到新拍檔 黃紫恩 飾演一對情侶，以故事形式配合節目內容，呢日兩位一齊接受《StarTalk》 詹可琳 專訪，介紹泰國好去處。
Jojo喺節目化身一位公主病女友，同男友Roger一齊喺泰國吃喝玩樂，最初Jojo知道同Roger合作都好驚，完全冇諗過大家咁夾。講到節目不斷添食，要搵料介紹實在有難度，但Roger就好放心話完全唔擔心呢個問題，因為泰國不斷都有新地標同商場落成，好似今集佢就會帶Jojo去睇蜥蝪，呢個地方好受遊客歡迎，Jojo話記得去到當日，Roger同佢講要小心啲蜥蝪，話口未完Jojo就被蜥蝪尾巴大大力咁拍打，場面搞笑。
節目話咁快就推出十年，Roger好開心節目可以陪伴觀眾成長，幸好自己都唔算老，而今輯節目亦會有冬蔭妹回歸介紹特色美食同潮物，仲有冬蔭哥哥玩戶外活動，內容多姿多采。
之前Roger曾經為節目創作片尾曲《冲歌》，反應叫好，今輯Roger延續精神，並參考周奕瑋有個節目叫《周遊人生》，於是將新一首片尾曲定名為《冲遊人生》，喺短短嘅片尾曲盛載咗好有意義嘅歌詞激勵人心。
另外，Jojo做藝人之餘亦身兼道士身份，佢本來親手寫一道招財符贈給Roger，但幾經波折都未能送到Roger手上，佢覺得呢個係天意，會將招財改寫第二樣祝福送俾Roger，幫佢做場好法事送上幸運祝福。