嚟緊11月將會六度喺紅館舉行演唱會嘅 梁詠琪 Gigi ，據統計佢邀請得最多次擔任佢演唱會嘉賓嘅歌手就係 鄭秀文Sammi ，對方共做過4次佢紅館個唱嘅嘉賓，Gigi自己聽完呢個統計都覺得好震驚。至於講到點解會成日邀請Sammi做嘉賓，Gigi就話對方相當Nice，無論樂壇上嘅新人定同輩，Sammi都非常願意支持。
講到同Sammi之間嘅小故事，Gigi就話有一件事自己記到而家，佢指自己有一段時間好驚面對觀眾，個人好驚青好冇信心，當時Sammi剛好喺台邊，於是對方就為佢打氣，Gigi形容當時Sammi畀佢嘅力量好似迎面撞埋嚟一樣。
Gigi又指當年因為自己唔夠成熟，所以唔識點處理負面情緒，只好靠不斷工作去逃避，佢話如果而家睇返轉頭，會選擇照顧咗自己嘅情緒，先繼續去工作。