容祖兒 宣布明年登陸啟德體育園主場館，1月22同23日舉行一連兩場，《AURA TOUR演唱會》。祖兒上一次於香港舉行大型個唱，已係2019年一連舉行19場嘅《PRETTY CRAZY》演出，當時無論舞台製作、服裝造型定整體演出都令人留下深刻印象。
相隔逾7年時間，終於正式落實全新演唱會消息，隨即就引發歌迷熱烈討論。演唱會命名為《AURA》，原意可解作一個人自然散發嘅光芒、氣場同能量，但今次演唱會概念中，就唔止係代表一個人嘅狀態，而係經過時間、經歷、音樂以及人同人之間長久交流後，慢慢累積而成嘅能量。
Joey走過廿多年音樂旅程，由最初最純粹喜歡唱歌，到走進色彩繽紛、華麗多變嘅舞台世界，再經歷唔同人生與音樂階段，最後重新回到最簡單、最本質自己，成為今次佢想表達俾歌迷嘅重要概念。
為呼應演唱會「回歸純粹」主題，祖兒亦選擇以最簡潔方式呈現海報。於舞台造型上一向敢於突破嘅佢，今次捨棄背景佈置裝飾，亦未有華麗服飾、誇張首飾，甚至連耳環、戒指亦刻意省略，以近乎素顏感嘅妝容，配合簡單大頭近照，呈現最自然、放鬆一面。
拍攝時祖兒時而大笑、時而鬼馬、時而安靜，未有刻意營造嘅華麗同距離感。雖然團隊曾試過唔同服飾、假髮同造型，希望尋找更新鮮嘅視覺，但最後仍決定回到最簡單的狀態。
祖兒本人就以「白粥」作比喻，形容吃盡天下美食後，有時最吸引人嘅，反而係最簡單、最原始嘅白粥。睇落未有太多修飾，其實更考驗細節，甚至連一條看似簡單嘅眼線都反覆調整。又笑言：「你唔好以為好易，今次係刻意地做一件好唔刻意嘅事。」