鄭伊健 一日連開兩場歌迷聚會，與逾千歌迷一齊預祝生日，伊健仲襯呢次發佈新Logo同歌迷會新「EKIN風樓」，又即場喺台上換新衫，大騷黑色背心露麒麟臂。
伊健為今次活動非常投入，唔止擔任監製同導演，又一手包辦rundown同遊戲環節，就連為Fans安排嘅打卡點、留言電話亭、更請全場食人氣雞蛋仔同燒賣等，全部由佢親自策劃同安排。而Fans上台玩遊戲嘅「伊健禮物包」獎品佢亦親自安排，當中包括人氣長龍店蛋卷、明星飯堂嘅隱藏版美食券、解壓小玩具同簽名閃卡等，非常有心思。
早前伊健邀請Nowhere Boys主音Van嘅太太Wendy合作設計全新「EKIN風褸」，呢日兩人更即場示範風褸，仲爆笑指有特別功能：「開心到跳舞」。伊健仲話：「希望大家著咗呢件『EKIN風褸』都會好開心 ！」
活動期間伊健又邀請Fans上台近距離玩遊戲互動，其中嘅「鐵粉認證」遊戲中，有男Fans不論冷門歌曲同變形海報都成功一秒搶答，伊健亦大讚佢實至名歸。之後又特別安排「大型唱K環節」，大屏幕播出歌曲卡拉OK，與全場大合唱《情路狂奔》同《Beautiful Day》。
其後伊健邀請合作無間嘅音樂總監 陳光榮 登場，再宣佈會將部份專為演唱會重新編曲嘅經典歌輯錄成唱片，現場又透過Fans投票選出歌單，更以兩人英文名Ekin同Punk組合取名為《EP》，台上大屏幕又播出兩人陳年合照作為封面。
之後兩人聯同、歌手朱雋言同結他手阿其，演唱《一起衝一起闖》、《你的我》，以及伊健首張唱片中嘅歌曲《Love is all》。之後再唱出包括《爸爸的汽水》，《極速》和《Together》等多首歌曲。
活動尾聲，台上播出世界各地Fans嘅示愛同唱歌影片，令伊健好感動。全場又齊聲高呼「生日快樂」又推出由蘇志威大女 蘇君蕎 炮製嘅生日蛋糕。而第二場活動結束後，因Fans熱情大叫唔肯離場，伊健要再次現，同每一位Fans擊掌道謝。
