TVB奇幻喜劇《驅魔速遞》歷經約兩個幾月嘅緊湊外景及廠景拍攝，於10月上旬順利煞科，吳偉豪（Ricco）喺社交平台貼出幕後花絮，見圖中印有「順達快遞」字樣嘅快遞紙箱，查實呢個就係劇中「表面是速遞公司，暗中驅魔」嘅主題。
Ricco喺社交平台貼出TVB 新劇《驅魔速遞》拍攝期間，主演與工作人員嘅幕後花絮，記錄眾人配合緊湊拍攝之外，留下好多歡樂又溫馨嘅回憶。
新片講陳曉華、Ricco、戴祖儀合組公司，表面上係速遞公司，暗中接受驅魔工作，隨後周嘉洛因緣際會下加入，眾人喺劇中有大量動作與打鬥戲，其中一張相見嘉洛與Ricco搞笑大騷手臂肌肉，另一張相見嘉洛與Ricco化逼真嘅「流血」傷妝，正與工作人員一齊喺電視城餐廳食點心。
相中見劇組上下打成一片，演員們與幕後工作人員不時開心聚餐，而陳曉華、戴祖儀嘉洛同Ricco因連續高強度拍攝，疲憊到等埋位前即「補眠」，直接喺外景折疊櫈上瞓覺，眾人見慣不怪，趁對方瞓著後喺旁邊做出搞笑表情。
Ricco於社交平台話無論情況幾危險艱難，只要呢班人喺一齊，似乎就冇嘢係冇可能。呢幾個月嚟，佢好享受所經歷嘅每一分每一秒，希望呢套劇可以快啲同大家見面🙌🏼。
《驅魔速遞》講喺AI時代下，電腦工程師張喆（周嘉洛飾）因工作被取代而走投無路，誤入一間表面上負責送貨、實際進行驅魔嘅神秘公司。冷艷驅魔人霍冰冰（陳曉華飾）睇中佢嘅通靈體質，並強行開啟「陰陽眼」，成為全隊「驅魔雷達」，專門負責鎖定周圍嘅心魔與靈異異動。
