舞台劇《Rabbit Hole》（心渦）明年1月初公演，而一眾演員 張繼聰 韋羅莎 余安安 譚旻萱 羅文澤等，已先後兩次聚首圍讀研習劇本了解角色。短短時間大家全程投入，劇中失去兒子嘅夫婦韋羅莎同張繼聰，演繹時更哭成淚人。
身為父母嘅佢哋，更指新劇探討親情同喪親而份外投入。阿聰指：「作為演員必須將自己嘅想像力發揮到極致去契合劇本，亦要想像如果我面對呢件事會有咩反應？當投入咁恐怖嘅領域時，嗰種撕裂感會令人感到恐懼。劇情會有令人落淚情節，我相信觀眾會同我哋一齊落淚，但劇中都有輕鬆時刻。最終會引導觀眾走向一個溫暖嘅境地。身為演員不可以俾自己陷入情緒失控或者心理困擾狀態，但我相信觀眾一定會深受感動。」
對於圍讀已經情緒爆發，阿聰亦都話需要自我調節。而Rosa亦有妙法：「食甜嘢調整狀態，避免長期沉溺。雖然題材沉重，但都係一個有趣嘅挑戰。」
阿聰表示撇開題材，劇本喺演技上已係高難度挑戰：「所有人都要好似日常傾偈咁對話，因為節奏緊湊，而且台詞瑣碎，講兩句就要打斷對方。如果唔記得邊個位打斷就會出大錯。所以大家節奏掌握上都要格外小心。」
Rosa亦都話：「面對優秀劇本，我哋都運用技巧盡己所能，結合情感、經驗同經歷呈現喺舞台上。希望觀眾感受到，編劇創作呢個故事，背後其實想傳達某種意義。劇中幾場對手戲寫得非常精彩，所以我哋都非常期待。」
