汪明荃 自宣布有意退休，減少幕前工作後，就不時會同老公 羅家英 去睇演唱會、舞台劇，好好享受生日。繼日前與友人去睇毛舜筠同林日㬢嘅舞台劇後，阿姐4號晚就陪家英哥出席「家英金秋同樂敘」，與一眾粵曲愛好者相敍。
呢晚家英哥除咗開金口為大家唱曲外，大家亦特意準備咗一個數字「80」造型嘅生日蛋糕，為上月22號生日嘅家英哥慶祝80歲生日。照中所見，家英哥身穿筆挺嘅深灰色中山裝，頸上繫着一條鮮豔嘅紅色圍巾，顯得喜氣洋洋，精神飽滿。阿姐則穿上來自比利時頂級獨立設計師嘅碎花襯衫，陪伴家英哥一同切蛋糕。
蛋糕上除咗有兩個象徵長壽嘅壽桃外，蛋糕旁嘅黃色生日牌上，更鬼馬地寫道：「Only You 家英弟弟 生日快樂 70年的知音朋友冼秋白敬賀」，字裡行間透漏出兩人的深厚感情。
網民睇到照片後紛紛留言送上祝福，祝家英哥生日快樂，身體健康，與阿姐恩愛永遠，更有網友打趣道：「希望家英哥能再唱一次Only You！」亦有眼利網民見到家英哥左手手掌貼上紗布，留意希望佢冇大礙。
