相信擁有一個舒適嘅安樂窩，係唔少人嘅追求，當然 張與辰 都唔例外啦，呢日佢就去到景色宜人嘅愉景灣拍攝睇樓節目，仲揚言話一定包大家滿意呀！
第一次嚟到呢度嘅與辰，被現場環境深深吸引，唔單只覺得環境好舒服，感覺就好似置身外國一樣，仲話可以住喺呢度嘅人相當幸福。當見到現場有一大片草地，與辰仲已經諗好，平時除咗可以喺度做下運動外，仲可以同毛孩喺度玩呀！
至於問到與辰如果要置業會考慮咩因素？佢就話一定要有開濶嘅景觀，好似海景山景咁，坐喺屋企望住個人都會放鬆啲，另外方便都係一個重要因素，與辰話最好就係近機場、港珠澳大橋就最好喇。
當與辰介紹完呢個樓盤後，佢坦言自己都有置業嘅衝動，仲話家人好贊成佢買樓，話一個男人一定要有樓有車，所以自己都往呢方面努力緊呀！