出道26年嘅 農夫 即將同 張繼聰 合演舞台綜藝騷《人夫集團》，C君 同 陸永 由當年嘅「地下Rapper」，憑幽默同口才深得觀眾受落，成功「入屋」之餘，亦成為廣告商寵兒。最近佢哋同阿聰推出新歌之餘，又為補健品拍攝新一輯廣告，期間兩人繼續以一貫惹笑風格示人，於廣告中化身「熱量收割機」勁飲勁食，「歎」住拍攝。
陸永 同 C君 一向予人嬉皮笑臉嘅形象，不過隨年月漸長，原來各自身體都開始出現小問題：疲倦、面黃、眼黃、有口氣等，都對應肝臟可能出現狀況，甚至有肝脂超標問題，身型瘦削嘅陸永大感驚訝，仲聽C君建議注重健康同開始使用保養品。
開始識保養身體嘅佢哋仲話：「大家可能睇唔出，我哋平時都有做開運動！做咗人夫、做咗爸爸之後，更加注意健康，因為都唔想屋企人擔心。健康貼士就係希望大家飲多啲水、瞓多啲覺、玩少啲手機同食啱保健品。其實呢個貼士主要係提醒我哋自己嘅啫。」
廣告中農夫演繹一般都巿人陋習，OT捱夜、卧床玩手機外，又狂飲啤酒同勁食炸雞。不過難得一邊工作一邊享受美食，佢哋就只感覺到好爽喇：「人生有幾多機會係可以一邊工作、一邊享受美食？呢個廣告完全刷新咗我哋對『工作』嘅定義，簡直係又正又開心。」
兩人為工作同度橋難免會捱夜，最「瘋狂」更試過兩日只瞓5小時：「屋企人都會擔心嘅，但係要做嘢就沒辦法啦。而家開公司壓力有時都有嘅，不過我哋兩個人有事就商量解決問題，有壓力最後都可以變到冇壓力。」
即將開騷嘅仲有其他工作排得密密麻麻，佢哋就話：「希望完騷之後可以放一個大假，不過其實都冇得休息太長時間，因為我哋已經準備要做新專輯。雖然唔知道幾時可以做好，但努力希望可以快啲同大家見面。」