鄧麗欣 最近推出新歌《已經離我太遠》，除赴台灣拍攝MV，更版Stephy主演嘅電影《金都》副導演阿鐦執導，加上導演黃綺琳同核心團隊操刀，令Stephy揚言此行係「《金都》Re-U」，MV中佢仲嘗試唔同造型配合大膽劇情。
Stephy話：「今次係我第一次喺台灣拍MV，而且所有場景、佈置同燈光都係非常之特別。唔同嘅場景、唔同嘅男主角仲有道具，令成件事充滿電影感。」新歌《已經離我太遠》由J.Arie作曲、黃偉文填詞、蘇道哲編曲兼監製，當然亦係Stephy同Wyman繼舊作《不要離我太遠》後，相隔逾20年再次合作。
講到兩首歌曲名稱間嘅巧妙呼應，Stephy話：「大家聽到個歌名可能會覺得有啲熟口面，我之前嘅《不要離我太遠》都係Wyman嘅作品。今次佢覺得相隔咁多年再合作，需要紀念一吓，大家都成長咗好多。好開心得到一首主題咁有意思嘅歌，好值得大家細味。」
MV情節故事中，Stephy擁有神奇粉紅藥水，可以將唱機、吸塵機等電器變成男士氹自己開心。佢就變出按摩暖男、博學健談者、跳舞型男，但就冇一位令佢心動，於是繼續尋找真愛。Stephy指：「最初開會聽Story board時，好難將畫面同首歌融合，但拍出嚟再細味之後會發現好多心思之處。跳出一般MV嘅套路，好有驚喜！」
Stephy喺MV中嘅唔同造型都令人非常驚艷，髮型、妝容到服飾都係佢同團隊精心設計，結果非常成功，不過亦同「嚇襯」自己。Stephy笑稱：「好想做一啲同平時好唔同、令人有驚喜嘅造型。今朝換好曬衫，連自己都嚇親。行落樓下時，問酒店前台姐姐嘢，佢都被我嚇親，好搞笑！」此行更滿足佢「食蛋餅」、「按摩」同「休息」願望清單，工作之餘非常盡興。