鄧紫棋 歷時3年嘅世界巡迴演唱會日前喺深圳落幕，G.E.M.仲宣布演唱會獲得「獨唱藝人演唱會單次巡迴體育場專場數量最多」嘅健力士世界紀錄。仲有消息指，G.E.M.喺深圳站舉行前，已秘密同拍拖多年嘅富二代造型師男友Mark（魏俊傑）喺紐約低調完婚，G.E.M.經理人公司亦為傳聞作出回應。
G.E.M.同Mark自2016年傳出緋聞，但直到2018年尾先公開認愛，喺2020年已曾經傳出兩人喺泰國舉行小型海島婚禮嘅消息。不過G.E.M.經理人迅速否認，仲強調G.E.M.未結婚，唔需要送上恭喜。而到2022年，有內地傳媒指兩人雖然一度傳出分訊，但最終甜蜜復合，強調兩人「早已修成正果領證結婚」，G.E.M.工作室之後亦正面闢謠。
但對於呢次傳出嘅紐約秘婚一事，經理人公司嘅回應就一反以往態度，只係表示：「藝人的私生活，沒有回應。」表現含蓄，同過往態度有極大分別。至於G.E.M.嘅歌迷就對呢次婚訊傳聞反應唔算太大，繼續沉浸喺演唱會圓滿落幕嘅氣氛之中。
傳聞已成人妻嘅G.E.M.，於深圳站又獻唱全新歌曲〈自由的你〉，網路上更極速出現大量AI翻唱同模仿版本，新歌由G.E.M.本人包辦詞曲創作，製作同編曲則由好友李榮浩操刀，兩人首次合作。G.E.M.所講嘅「自由」，係當科技令愉悅同便利唾手可得，甚至變得不可或缺時，人依然可以真實感受、獨立思考，並保有為自己作出選擇嘅能力。
佢仲表示錄音過程一樣非常「自由」： 「自從自立門戶做音樂，今次係第一次安安分分做唱作歌手。製作人嘅工作我真係掂都冇掂，完全交晒俾浩哥。真係太輕鬆、太自由喇！」