喺《女神配對計劃2》力求同 郭珮文 舊情復熾嘅前男友 lce俞鋆瑞 ，呢日同組合VIVA仲有IdG Bubbles，齊齊扮鬼扮馬現身一個萬聖節活動，日前被指已同JW王灝兒秘婚嘅 王至尊 亦有出席，不過佢未接受傳媒訪問就匆匆離場。
一直揚言要追返Juliana嘅lce，即使面對兩位強敵但仍然充滿信心，佢仲話要約Juliana一齊去慶祝Halloween。lce分享，Julianna知道佢好鍾意萬聖節，而佢自認自己好鍾意被嚇，不過Juliana就較為細膽，所以可以互補，自己可以保護返Juliana。
lce仲話，如果約到Juliana就打算扮熱狗，因為Juliana見到一定會笑，而Juliana就可以扮茄汁，咁樣件事就可以變得好浪漫。
以女巫装現身嘅VIVA喺打扮上都落足心機，而四位當中最大膽嘅非Ada莫屬喇！Ada就話，自己會喺屋企睇鬼片，但三位姐妹就會好驚。雖然去鬼屋嘅話自己都會驚，但更多係期待被嚇，其他三位成員聽見時都即刻擰頭，自認係驚青派。
