薛家燕攜5歲孫慈善行騷 讚Julian具音樂天份計劃嫲孫同台演出

薛家燕同5歲寶貝孫石汶栩（Julian）呢日為慈善一齊行騷，寶貝孫全程表現淡定，令家燕姐覺得好驚喜，家燕姐最近工作忙不停，事前冇時間同孫仔排練，完全諗唔到孫仔好識擺甫士，Julian仲話鍾意行Catwalk添！

Julian話啲甫士係自己創作，家燕姐話阿孫好鍾意音樂，又學打鼓、彈琴、跳舞同游水等多才多藝，加上精靈可愛嘅Julian懂多國語言，難怪家燕姐錫到個孫燶。

家燕姐嚟緊開騷，想兩嫲孫同台演出，Julian仲有機會為嫲嫲擔任鼓手，同場行騷仲有甄澤權（Louis）兩父女，愛女Kacy受訪時，對答如流毫不怯場，Louis話愛女一向好鍾意表演，愛女仲向Louis送上香吻。