熱播劇《死有對証》踏入結局周， 陳曉華 馬貫東 韋家雄 阮浩棕 等一眾演員齊集為劇集宣傳。喺劇中飾演毒舌法醫嘅韋家雄因為狂爆金句大受歡迎，活動上仲獲頒金句人氣王名銜。玩遊戲期間，阿東亦抱起Hera展示力的表現。劇集播出以嚟連續三個星期收視上升，對演員嚟講真係一個大喜訊！
Hera表示感恩可以加入劇組，阿東更用「如果冇家雄哥，我哋就好似一個停擺嘅齒輪」去形容前輩嘅重要，就連Hera都好讚成呢個講法。Hera仲話家雄哥嘅人生充滿爆肚，自己都係跟佢學習，所有自由奔放都係學家雄哥。講到劇情發展，阿東透露，除咗生死之外，大家一定要留意佢同Hera最後一場戲，Hera都話嗰場戲好Sweet㗎！
韋家雄嘅實力演出獲觀眾激讚，尤其佢嘅金句為認真嘅情節增添咗唔少生氣。家雄哥話自己都唔知有咁多金句，因為每日拍攝，積埋積埋就變成咁多。黎燕珊都認同家雄哥係金句王嘅事實，表示同對方開工係好開心嘅事。
家雄哥分享，自己都會為劇本作出小小修改，因為知道角色經常要鬧人變得乞人憎，所以會將佢變得可愛啲。對於觀眾認為佢呢次可以問鼎視帝，家雄哥謙虛回應：「觀眾俾咗我喇！已經攞咗60分，已經好開心。」
珊姐日前喺節目《流行都市》宣布將會同圈外男友結婚嘅好消息，大家都為呢段黃昏戀可以修成正果而送上祝福。珊姐都好感謝同事、朋友向佢道賀，淨係覆訊息都覆咗一日。講到婚期係咪定喺明年，珊姐就話同另一半一直有計劃，只係當日上節目突然講咗。至於求婚，珊姐答得甜蜜，簡單形容已經過咗，呢一關係一定要做嘅，自己而家要追返啲時間，搵返失去咗嘅嘢。
同樣都係快將成為新娘子嘅王菲，喺劇中同男對手一場車震戲引發迴響。阿菲就話，呢場戲係較為後期先拍，前期一直都想快啲拍埋呢場戲，因為好驚。不過真係拍攝嘅時候就好順利，導演都話出嚟嘅效果都好好。阿菲都話播出後收到好多觀眾分享Cap圖，未婚夫就隻眼開、隻眼閉面對。講到婚期，阿菲就話會即將睇場地，希望搵到場地同日子都啱。
《死有對証》星期一至五晚 20:30 翡翠台