任達華、此沙、張兆輝、盧慧敏現身電影首映禮，有份參演嘅著名龍虎武師、劉家良入室弟子何麥喺首映當日因心臟病離世，佢喺離世前三日仍然為電影宣傳。
華哥今次嘅角色充滿挑戰性，佢形容角色擁有極高權力，而且係一個霸道又「狼心狗肺」嘅人，至於輝哥就飾演一個有義氣嘅正派老差骨，而且會好識保護自己。
導演孔令政要喺鏡頭後指揮住影帝級演員，佢都話自己事前要做足準備，首先要拋開粉絲身份，因為幾位演技太勁，如果唔係會集中唔到。孔令政仲話可以睇住幾位影帝同台演出真係好享受，有時睇睇下個Mon都會太過投入而唔記得嗌「Cut」，佢都好感激得到一眾前輩愛錫同支持呢套電影。
此沙可以一次過同多位偶像合作，佢都覺得係一件夢幻嘅事，雖然壓力好大，但係好幸福。因為唔係同偶像合照或者拍短片，而係工作合作，係一件好有成就感嘅事。至於Amy Lo喺戲中同一眾影帝都有唔少對手戲，佢嘅心情同此沙一樣，覺得件事好夢幻，亦從未諗過有一日可以同咁多位偶像合作，仲跟住佢哋學到好多嘢，加上係戲中為數不多嘅女角色，所以都得到好多照顧。
