10月6號係台灣已故女星 大S 徐熙媛 嘅50歲冥壽，大S嘅丈夫 具俊曄 妹妹小S 徐熙娣 S媽以及好友 范瑋琪 同黑人 陳建州 夫婦，呢日齊齊著上大S鍾意嘅粉紅色打扮，帶埋香檳、蛋糕到墓園大S墳前追思。
小S喺社交平台分享多張親友喺墓園嘅合照，相中可見大S嘅墓前放滿粉色系鮮花，佢同媽媽喺墓前擺出對天空大叫嘅手勢，又感性寫道：「今天是我姐48歲的生日，當然要來幫她慶生，帶了她最愛的香檳、蛋糕，坐在她旁邊，又哭又笑地聊著我們的故事，以及我們有多想她！」
小S形容呢日嘅風雨時大時細，搞到大家就嚟凍死，真係好符合大S性格，雖然行文流露小S嘅幽默，但文末一句：「明年我就比她大了，我就多了一個超級巨星妹妹，大S。」充滿佢對大S嘅思念之情。
至於之前傳同S家因遺產問題不和嘅具俊曄，就喺合照中展現笑容並輕搭S媽肩膀，以行動打破早前盛傳嘅爭產不和傳聞。大S嘅好友阿雅就喺社交平台撰文分享同大S多年姐妹情，懷緬好友。
