憑174公分嘅身高同火辣身材以模特兒身份出道嘅 李籠怡 當年推出歌詞洗腦嘅《夜遊杜拜》攀上事業高峰，更曾因拍瘦身廣告展現澎湃身材而被封為一代性感女神。不過因幕前演出被定型「花瓶」同「肉彈」等，佢約2010年前後決定淡出，更卸下光環嘗試唔同工作。
其後佢為彌補過去未完成嘅學業積極進修，先後修讀中大時裝設計同GIA珠寶鑑證課程，隨後又遠赴英國深造，更考入全球頂尖嘅皇家藝術學院攻讀珠寶設計碩士。
近年佢已成功轉型成為國際認可嘅珠寶設計師，作品更曾榮獲「珠寶界奧斯卡」之稱嘅英國金匠工藝與設計大獎（GCDA）銀獎，亦受聘珠寶公司從事公關同設計工作，亦積極籌備個人珠寶品牌。 久未公開露面，現已改名為 李宜錚 嘅佢 近日應品牌邀請現身巴黎時裝週出席春夏展。
捨舊日Tiifany稱號改名Oliviia嘅佢，以一身俐落兼時尚感造型亮相，以源自唐代靈感嘅皮革抹胸，搭配V領蕾絲邊絲質長外套，展現出極具層次感風格。 除咗精緻造型之外，佢早前於巴黎街頭街拍亦同樣引人注目。Oliviia換上品牌一襲華麗金色禮裙，於巴黎古典建築前展現出宮廷浪漫情調。
李宜錚久違亮相時裝騷，事前亦做足準，靠跳舞同飲食控制一個月內減足17磅。狀態大勇嘅佢令人更期待佢以全新面貌於時尚界同演藝事業上嘅動向。
