陳曉華 同 韋家雄 作客 薛家燕 嘅電台節目，分享拍攝熱播劇《死有對証》嘅難忘事。佢哋喺劇中嘅師徒組合大受歡迎，更成為熱話，兩位都好感恩可以得到觀眾喜愛。Hera就話，拍呢套劇嘅時候自己仲係好新，其實自己都會緊張，不過對住家雄哥就冇呢份感受。所以Hera就覺得係家雄哥特登令大家好輕鬆、放鬆，所以大家先會有好大自由度發揮，仲會對劇本有修飾同加以創作一啲小動作等等。
家雄哥喺劇中完美演活毒舌法醫，一連串嘅刻薄鬧人金句，睇得觀眾常受落，仲推舉佢問鼎視帝。家雄哥就話，得到觀眾肯定就等於己經拎到視帝獎項，所以真係好感激大家支持。
Hera喺劇中不時需要出入解剖室驗屍，拍攝期間佢仲遇上解釋唔到嘅靈異事件。Hera表示，自己喺拍攝時突然手機響，但因為佢個性高敏，並唔鍾意聽到聲、唔鍾意震機，所以係長期靜音，唔會用來電鈴聲，鬧鐘都係用另一個鈴聲，所以感覺事件好奇怪。佢仲話，喺拍劇期間經常感覺到有嘢喺附近，但自己亦唔會有好驚嘅感覺。
《死有對証》星期一至五晚 20:30 翡翠台