10月7號係安仔 周嘉洛 31歲生日，雖然生日都要開工，但係嘉洛就當作係一種福氣。嘉洛一向人緣好好，呢日喺Canteen食飯嗰陣就獲嘅風少陳浚霆突襲驚喜，就連唔駛開工嘅三太樊亦敏都專程送上限定飛吻。
驚喜一浪接一浪，正同嘉洛一齊開工合作節目《好嘢講多啲》嘅葉蒨文同焦浩軒，亦突然捧出一個生日蛋糕，成個Canteen瞬間變成狂歡派對，大家都好戥壽星仔開心，齊齊祝嘉洛生日快樂。收到大家滿滿嘅祝福，嘉洛都覺得好窩心，亦誠心許願。
收到兩個蛋糕嘅嘉洛表示，一切都好驚喜，自己每次收到蛋糕都會覺得好感恩同受寵若驚。三太就話，自己記錯咗嘉洛生日係前一日，所以前一晚連夜剪片，呢日特登返公司同嘉洛慶祝。龔嘉欣透露，風少對嘉洛真係好Sweet好窩心，因為當風少知道嘉洛喺公司，就即刻準備生日驚喜，而且嘉洛講過唔需要蛋糕，風少就去買咗蘋果批做替補。
嘉洛自認自己對儀式感冇太大追求，同朋友一齊食飯已經好開心，唔需要特別破費。不過風少同三太就話，佢哋對儀式感好大感受，所以好想嘉洛收到蛋糕，三太仲祝嘉洛心想事成，想賺到十五億嘅願望可以早早實現。
