羅家英現身代言活動分享日常投資心得，家英哥就認自己喺投資方面比阿姐汪明荃叻好多，不過由於日常開支同醫療費用負擔大，所以佢都要繼續努力搵錢。家英哥分享，自己接咗兩套電影，其中一套仲係同相隔十年冇合作嘅鮑起靜合作，而導演就係一位印度人，電影同傳統傳承以及粵劇有關，所以特登邀請家英哥合作。而鮑姐受邀後，得知有演員陣容有家英哥，佢特別開心，亦唔計較價格，直接答應接戲。
家英哥一向都好識得點樣氹阿姐開心，但因為兩個人好少戴黃金，所以唔會過時過節買金飾俾阿姐，但會投其所好，買一啲阿姐鍾意嘅嘢令佢開心。
10月7號喺家英哥嘅農曆生日，大會特別準備咗蛋糕幫佢慶祝，家英哥就話暫時未收到阿姐送嘅生日禮物，但前兩日收過西裝，唔知算唔算係禮物，因為阿姐冇講。家英哥表示，每年都有收到一啲好難忘嘅生日禮物，去年就有一張按摩椅，可以喺車用都得，前幾年仲收過遙控飛機。至於生日願望，家英哥就希望世界和平，祖國繁榮安定，香港經濟鵬飛，TVB蒸蒸日上，大家都身體健康。
