內地演員 王星 去年年初誤信「赴泰拍戲」而墮入緬泰詐騙園區，更喺短短四日經歷三次轉賣。所幸係王星最後喺女友鍥而不捨向多方求助，以及有關部門營救後，終於成功脫險。
近日內地公安部同央視聯合攝製紀錄片《緬北電詐覆滅紀實》正式播出，當中揭露王星遭騙至詐騙園區嘅細節。當初王星喺演員交流群見到一名叫做「顏十六」嘅副導演，發布泰國拍戲通告，稱具體拍攝內容保密，並開出劇組包辦機票住宿，以及約定日薪2500元人民幣，令王星答應赴泰。
結果王星抵達泰國後，所乘坐嘅車輛未前往預訂好嘅酒店，反而一路開往泰緬邊境。王星察覺危險，向女友發出約定暗號「貓餵了沒有」，王星女友收到留言後迅速報警。同時，王星被安排換車，再被被多名武裝人員挾持入妙瓦底園區，完全失聯。
紀錄片提及王星喺呢段期間被轉賣3次到唔同園區，即使想自費贖身都冇辦法，因為對方回答：「妙瓦底最缺的是人，不是錢」，令佢非常絕望。
而內地警方接到王星女友報案後，即隨啟動國際執法合作機制，同泰國、緬甸警方展開營救及案件偵辦，王星最終獲救並平安回國。全案上海市檢察機關已對相關犯罪集團17名成員起訴，涉嫌以假拍戲通告招募人員嘅主犯亦已經落網。
